Алматыдағы автокомпоненттер зауыттары: «Астана Моторс» әкімдікпен және халықаралық серіктестермен меморандумға қол қойды
Астанадағы Kazakhstan Global Investment Roundtable (KGIR-2022) жаһандық инвестициялар жөніндегі форум аясында автокомпоненттер өндіретін зауыттар салу туралы үш меморандумға қол қойылды.
Алматыда автокөлік орындықтарын өндіру жобасын іске асыру туралы меморандумға қала әкімдігі мен «Астана Моторс» компаниясы арасында қол қойылды.
Алматы қаласында автокөліктерге арналған резеңке және пластик бұйымдарды өндіру бойынша инвестициялық жобаны іске асыру туралы меморандумға қала әкімдігі, «Норпласт» және «Астана Моторс» компаниялары арасында қол қойылды.
Алматыда автокөліктерге арналған электрондық аудио-бейне жабдықтарды (мультимедиа жүйелерін) өндіру бойынша инвестициялық жобаны іске асыру туралы меморандумға қала әкімдігі, оңтүстік кореялық Motrex компаниясы және қазақстандық «Астана Моторс» компаниясы арасында қол қойылды.
«2022 жылдың төртінші тоқсанында «Астана Моторс» шетелде автокомпоненттер өндіру тәжірибесі бар Youngsan, Motrex, «Норпласт» шетелдік серіктестермен бірлесіп, Hyundai автокөліктеріне орындықтар, полиуретан кілемшелер, қанат қорғаныштар, кірқалқандар және мультимедиалық жүйелер шығаратын үш зауыттың құрылысын бастайды. Зауыттар Алматы қаласының индустриялық аймағында салынады», – деді «Астана Моторс» СЕО Бекнұр Несіпбаев.
Жобаға салынатын инвестиция 15 млн долларды құрайды. Өндірістік жайлардың ауданы – 9 500 ш. метр. Кәсіпорындарда 175 жұмыс орны құрылады. Өндірістерді іске қосу 2024 жылдың бірінші тоқсанына жоспарланған.
Айта кетсек, жақында елордада ҚР СІМ Инвестиция комитеті мен «KAZAKH INVEST» ҰК» АҚ ұйымдастырған жаһандық инвестициялар жөніндегі KGIR-2022 қазақстандық дөңгелек үстелі өтті.
Қатысушылардың арасында 500-ден астам жетекші халықаралық компаниялар мен отандық бизнес өкілдері, инвесторлар, беделді сарапшылар және пікір көшбасшылары, сондай-ақ салалық министрліктердің басшылары, квазимемлекеттік компаниялар мен отандық бизнес жетекшілері бар.
Әлемдік экономиканы дамыту, жаһандық әрі өңірлік инвесторлар үшін Қазақстанның инвестициялық тартымдылығы мен мүмкіндіктері, азық-түлік қауіпсіздігі және жаңа экономикалық ақиқат жағдайындағы логистика мәселелері талқыланды.
KGIR-2022 аясында кәсіпкерлер мен инвесторларды елімізді дамытуға қосқан үлесі үшін марапаттау рәсімі өтті. «Астана Моторс» компаниясы Қазақстанның ең ірі жұмыс беруші марапатына ие болды.