Hyundai және Satbayev University қазақстандық инженерлерді даярлау үшін ынтымақтасты
8-9 қазанда Satbayev University жоғары оқу орнында «Астана Моторс»компаниясы ұйымдастырған бірегей тренинг өтті.
Аталған басқосуға 2023 жылы Қазақстанның жетекші техникалық жоғары оқу орны мен Hyundai Trans Kazakhstan («Астана Моторстың» еншілес компаниясы) зауыты арасында басталған ынтымақтастық себеп болды. Бұл ынтымақтастық шеңберінде компанияның мамандары автоөнеркәсіптің болашақ инженерлері мен мамандарымен өз тәжірибесімен бөліседі.
Өткен жылы Satbayev University және Hyundai Trans Kazakhstan зауыты кадрлар резервін құру, машина жасау саласындағы ғылыми кадрларды даярлау, сондай-ақ өндірістік процестер мен білім беру бағдарламаларын бірлесе әзірлеу бойынша ынтымақтастық туралы меморандумға қол қойды. Тараптар теориялық және практикалық бағдарламаларды дайындау, тәлімгерлік жүйесі мен қос тарапты оқытуды енгізу, сондай-ақ MBA және DBA деңгейлі техникалық және басқарушылық кадрларды даярлау шараларын қамтитын жол картасын жасады. Бірлескен ғылыми-зерттеу жұмыстары мен зертханаларын жүзеге асыру үшін «Астана Моторс» және R&D орталығы негізінде машина жасау кафедрасының филиалын құру жоспарлануда. Бүгінгі таңда Hyundai Motor Company болашақ қазақстандық мамандарды оқыту үшін оқу материалдарын, тораптар мен агрегаттардың макеттерін, үлгілерін тұрақты түрде ұсынып отырады, сондай-ақ болашақ мамандар үшін практикалық біліммен бөлісуге дайын тұлғалармен кездесулер өткізеді.
Осылайша, ынтымақтастық аясында «Астана Моторс» компаниясы ұйымдастырған бірегей тренинг өтті. Оңтүстік Кореядан келген Hyundai Motor Company-дің жетекші инженерлері Энди Ли және Тейлор Сон автокөлік саласындағы ең соңғы зерттеу жұмыстарымен және жетістіктермен таныстырып, өзекті сұрақтарға жауап беру үшін қазақстандық студенттермен кездесті.
Спикерлер электрлік және электрондық жүйелер саласындағы озық технологиялар, сондай-ақ электрмобильдер туралы баяндап, ADAS (Advanced Driver Assistance System) электронды технологиясына шолу жасады және жүйе жұмысының негізгі қағидаларымен бөлісті. Спикерлер сөздерін аяқтағаннан кейін, студенттер спикерлермен тілдесіп, Hyundai электрмобильдеріне арналған E-GMP EV симулятор платформасын және алаңда ұсынылған IONIQ 5 электр автокөлігін егжей-тегжейлі зерттеу мүмкіндігіне ие болды.
Суретте: Hyundai Motor Company, Astana Motors және Satbayev University өкілдері.
Қатысушылар өткізілген басқосу университеттің әлемдегі ең ірі автокөлік жасау компанияларының бірімен кәсіптік ынтымақтастығын нығайтуға бағытталған тағы бір қадам болғанын атап өтті. Satbayev University студенттері үшін осындай деңгейдегі мамандармен танысу – автоөнеркәсіпте қызмет етіп қана қоймай, соңғы зерттемелерді енгізу арқылы оны дамытатын адамдардың өздерінен ең өзекті зерттеу жұмыстары мен үрдістер жөнінде ақпарат алудың тамаша мүмкіндігі. Оған қоса, олардың басым көпшілігі үшін Hyundai Trans Kazakhstan болашақ жұмыс орны болуы мүмкін, себебі зауыт машина жасау саласындағы кадрлар резервін құру жұмысын белсенді жүргізуде. Қазіргі уақытта кәсіпорында 1300-ден астам адам жұмыспен қамтылған. Satbayev University ректоры Мейрам Бегентаев серіктес компаниялармен осындай тығыз ынтымақтастық студенттерге оқуды аяқтағанға дейін өндірісте жұмыс істеу үшін қажетті барлық практикалық дағдыларды алуға мүмкіндік беретінін атап өтті.